ماذا لو كنت تعرف انك ستموت قريبا ؟ إقرا اجابات ناس عاشت الموقف فعلا

samiros
مشاركات: 233
اشترك في: الثلاثاء يناير 22, 2019 11:42 am
اتصال:

ماذا لو كنت تعرف انك ستموت قريبا ؟ إقرا اجابات ناس عاشت الموقف فعلا

مشاركة بواسطة samiros » الأحد إبريل 14, 2019 8:02 am

سؤال على موقع Quora بيقول:
"هل لو عندك سرطان من المرحلة الرابعة - بتكون مُدرِك إنك هتموت قريب، ولا الناس اللي بيوصلوا للمرحلة دي من المرض بياخدوا أدوية تفصلهم عن الواقع؟"

(قبل ما أجيب لك الإجابة اللي هتخليك تقشعر، عاوز أقول لك ببساطة إن Stage IV Cancer معناها ورم سرطاني بدأ ينتشر في أعضاء تانية في الجسم غير العضو اللي بدأ فيه، وهو مش دايمًا بيكون حاجة مستحيلة في علاجها؛ لكن العلاج بيكون صعب جدًا في أغلب الحالات، ونسب نجاح الشفاء في المرحلة دي بتكون قليلة شويتين).

المهم إن السؤال ده عليه إجابات كتير جدًا، لكن أكتر إجابة مؤثرة، وأكتر واحدة Upvoted كانت بتاعة Ann Silberman، واللي بتعرف نفسها على إنها Full-time cancer patient، وإنها عايشة بسرطان من المرحلة الرابعة غير قابل للشفاء، وبتقول:

"أنا عندي سرطان من المرحلة الرابعة، باخد أدوية بسيطة، لكن بالطبع أنا واعية تمامًا. في الحقيقةأنا أخدت القطة بتاعتي للطبيب البيطري النهاردة، بسوق عربيتي بنفسي وأنا رايحة جلسات العلاج الكيماوي وأشعة المسح الذري، وبعيش - نوعًا ما - حياة طبيعية. (أنا تعبانة لدرجة تمنعني من السفر أو زيارة أماكن كتير) لكني بقرأ، بعمل أشغال يدوية كتير، بتواصل مع أصدقائي، بتسوق، ويكتب على Quora.

أيوة أنا عارفة إني هموت... لكني مابقيتش بفكر في الموضوع ده على إنه هيحصل قريب؛ خصوصًا إني عايشة كدة بقى لي ست سنين. ممكن جدًا أموت قريب، لكن خوفي وقلقي قلّوا جدًا دلوقتي؛ فأنا - زي معظم الناس اللي بنفس حالتي - بنتشخص بسرطان مُزمِن لكننا مابنمُتش فورًا، وإنما بنعيش به لمدة شهور أو سنين.

في العادة بنجرب أنواع من العلاج؛ لأن الأنواع المختلفة للسرطان قد تستجيب للعلاج... حتى أسوأ الأنواع. أنا عندي صديقة لسة عايشة بعد 3 سنين من تشخيصها بإنها مصابة بـGlioblastoma واللي عادةً بيقضي عليك في خلال كام شهر".

(الـGlioblastoma نوع من الأورام اللي بتنمو في المخ، وبعض أنواعها بتكون عنيفة جدًا لدرجة إنها بتقتل المصاب بها في خلال 6 شهور كحد أقصى).

بعد كدة استكملت Ann كلامها وقالت:
"أنا حاليًا باخد النوع التامن من العلاج الكيماوي، نص كبدي مُستَأصَل، حصل لي تسمم في الدم قبل كدة كان هيموتني، ومؤخرًا عملوا لي إشعاع Gamma knife على الكبد لأن ظهرت فيه ثانويات من الخلايا السرطانية تاني. أحيانًا الأشعة بتبين إن الخلايا السرطانية انتشرت في جسمي - آخر مرة كانت وصلت لبطني ورئتَيَّ - بعدها الدكتور بيغير العلاج، والعلاج الجديد بينجح إنه يوقف انتشار الخلايا في جسمي لبعض الوقت. أنا متأكدة إن في مرة من المرات مفيش حاجة هتنفع وحظي هينفذ في النهاية... أنا عارفة إن السرطان بتاعي مالوش علاج.

بحكم وجودي في عالم السرطان لفترة مش قليلة، اتكلمت مع مرضى تانيين حالتهم غير قابلة للشفاء... كتير منهم مكانش محظوظ زيي فيما يخص الوقت اللي عاشوه بعد تشخيصهم، لكنهم ماكانوش بيتلقوا علاج عنيف أو حاجة تغيب الوعي إلا في المراحل الأخيرة... لما الألم يتمكن منهم.

الناس متخيلة إن الأطباء بيدوك التشخيص وبعدين يخدروك لغاية ما تموت، لكن ده مابيحصلش أبدًا؛ الناس دول بيكونوا عارفين إن موتهم قريب. معظمهم بيتصالح مع الحقيقة دي، وقليلين منهم عمرهم ما بيتقبلوا ده بسهولة.

أنا عاوزاك تعرف إننا - المصابين بسرطان من المرحلة الرابعة - أصدقاؤك وجيرانك. انت أكيد وقفت ورانا مرة في السوبرماركت أو عديت جنبنا في الطريق قبل كدة. ممكن كمان تكون كَسَرت علينا في الطريق أو أشَرت لنا بحركة بذيئة وانت سايق ظنًا منك إننا عطلنا عليك الطريق... قد تكون ابتسمت لما عَدّينا من جنبك بعربياتنا، أو ممكن بكل بساطة تكون... تجاهلتنا.

انت غالبًا لو بصيت في وشي مش هتعرف إني مريضة؛ مش كل العلاج الكيماوي بيوقع الشعر، لكن معظم الناس مايعرفوش كدة؛ معظمهم مابيصدقوش إني مريضة بالسرطان علشان عندي شعر. أنا فقدت شعري مرتين قبل كدة، لكني ماقصيتوش من آخر مرة وقع فيها - ومع ذلك أنا ماوقفتش العلاج الكيماوي أبدًا. أوقات كتير كنت بحس بالتعب وشعري موجود أكتر من إحساسي بالتعب من غيره. فقدان الشعر رمز للسرطان، لكنه مش مقياس أبدًا لمدى الألم والتعب اللي بيعانيه مريض السرطان ولا دليل على مدى سوء حالة الشخص ده.

لو شفتني على الطبيعة هتلاقيني سيدة رفيعة في منتصف العمر بشعر رمادي طويل، لابسة هدوم على الموضة وفي قمة الشياكة. أنا متركب في جسمي قناة مخصصة للعلاج، لكن غالبًا انت مش هتشوف القناة دي لأنها مستخبية تحت الهدوم. لو شفتني ماتقدرش أبدًا تعرف إزاي حياتي كانت صعبة في الكام سنة اللي فاتوا. مش هتعرف إن الواقع بتاعي هو إني عايشة وأنا عارفة إن الموت ممكن يكون أقرب بكتير مما أتصور. أنا عمري ما بقول الكلام ده لحد، لكني كنت بعمل كدة أحياناً قبل ما أتأقلم مع الفكرة دي.

أما بالنسبة لأصدقائي، فلما ساعتهم بتقترب بيعرفوا... العلاج اللي بياخدوه بيتوقف عن العمل فبيحاولوا يقضوا بعض الوقت مع عائلاتهم، بيشتد عليهم المرض، أجسامهم بتبقى أضعف، الألم بيبقى أقوى، وهنا بيبدأوا في تلقي العلاج اللي يغيبهم عن الوَعي... عادةً ده بيحصل في آخر أسبوع أو حاجة.

كل واحد مننا عنده قصة كبيرة، مش كدة؟
لازم نعرف إن الناس المصابين بالسرطان - حتى الغير قابل للشفاء - موجودين في كل مكان، ومش لازم دايمًا يكون شكلهم زي ما بتتوقع؛ الموضوع مش مجرد إن المريض بيتشخص بإنه غير قابل للشفاء وبعدها بيموت فورًا؛ كتير مننا بيعيش لفترة مع المرض.

عارف الناس اللي بيتكتب في النعي بتاعهم "بعد صراع طويل مع مرض السرطان"؟
معظمنا بيكون كدة"

بقلم /Ahmed Gedoo

صورة



  • المواضيع المُتشابهه
    ردود
    مشاهدات
    آخر مشاركة

العودة إلى ”منتدى الثقافة العامة“