العروس الجزائرية (أساسيات قائمة جهازك)

[رتال القرآن مروة]

القائمة مذكور فيها المسلتزمات دون نقصان أو زيادة لكن في النهاية كل وحدة على حساب مقدورها ودراهمها تقدري تزيدي و تنقصي حسب الحاجة تاعك و حسب مقدورك :

1_ ملابس داخلية:

10 دوبياس و واحد أبيض للعرس و تقدري تشريهم مسيباريين و تنسقي+ 6 سليبات لونهم داكن لأيام الدورة. 6بيستي عاديبن و زوز شيك  +3سيكليسات

2_ملابس_النوم :

ديزابيي بيضاء+ 7 نويزات و حدة بيضاء للعرس (أخطيك من عشرين و اربعين مش راح تقفل لحوانت و بعد عرسك راح اتحبي الا الجديد )+ بنتاكور أبيض بدونتال تلبسيه تحت لاغوب في العرس+ بيجامة قطن بالكيمينو هاذي باهية للشتاء + كاين تانيك أونصونبل يجي فيه جيب ميني مع بيستي هاذو ادو منهم واحد برك للتغيير اختارو ألوان يلفتو الانتباه لأنهم هاذو لي يشوفهم راجلك.
3_ ملابس الدار :

4 بيجامات صيف + 4 بيجامات شتاء+( 4 قنادر صيف + 4 قنادر شتاء هاذو بالنسبة لساكنة مع دار شيخها و لساكنة وحدها متكثرش لقنادر) + اشري تانيك فيزو مع ايكات ولا كاش عفسة شابة من غير البيجامات تلبسيهم قدام راجلك باه تبدلي +5 فيزويات شتاء+2 فيزويات صيف+ بلايغة شابة للصيف+ بلايغة شتاء للشغل و زيدي وحدة نتاع الدبدوب خخخ للتقرجيع +5تقاشر للشتاء+ بيليرو شتاء+ بيليرو صيف .

5_ملابس للخرجة :

ديري قندورة شابة نتاع صيف وواحدة أخرى نتاع شتاء ينفعوك كي تكوني رايحة لدار شيخك ولا معروضة قندورة باهية وخفيفة لأنو متقدروش تلبسو لبسة التصديرة في أي وقت + صابو ذهبي شباب.. حوايج الخرجة 2حجابات (كولار مختلف) +2 صبابط خرجة +2 ساكات وحدة كبيرة و حدة صغيرة + تروس +2خمارات كيما كولار حجاباتك + عباية شابة لكاش عرس+ ديباوات باه تستري رجليك

6_أشياء اضافية :

علبة تقليم الأظافر+علبة الخياطة + فونطاي . فراش الشمبرة : كوفرولي بلون كاسي شباب لليامات الأولى + كوفرولي سانبل للتبديل + ريدو للكوفرولي السانبل +2 كوفيرطة + سيري 3 فاز يجو معا بعضاهم + زوج نابات لي تابل دونوي + و اذا تقدري كوات +3 دراوات + زوج وسايد حساسية ليك ولراجلك .

7_ فراش الصالة :

ديري صالون ماروكان وتشريلو زربية وكاش ريدو طبعا هاذي على حسب كل وحدة ومقدورها . فازة شابة + ساعة+ زوج بساطات تاع بنج شابين +زوج مطارح بنج و تفاهمي مع راجلك يشري الأواني (اذا عندك كوزينة ) ادي غير الحاجة لتسحقيها برك متكثريش مثلا سنيوة + سرفيس +كيسان جي مع قرعتهم + طباسة واذا تقدري تشري كثر من هكا.

8_ صوالح الدوش :

صورتدبان + منشفة كبيرة + 4 مناشف نتاع وجه + 2 مناشف للتوالات + ساك دو طوالات+ مالاة الحمام والطابوري والخ

9_ آخر و أهم حاجة التصديرة :

متكثروش يالبنات شحال من وحدة قاتلي قعدو غير في الخزانة ديري 5 حوايج ملاح مع زوج صبابط بلي بوشات (ذهبي _فضي) فيها ألف و بركة ولي عندها طبعا تقدر تزيد متنساوش

صوالح للشعر(أكسوسواغ)  باه تباني باهية (مثل تاج يوم العرس . تاج ذهبي للصبوح . صياغة العرس .. )

10_كوسميتيك و ماكياج:

أهم حاجة للعروس زوج بارفا ملاح وزوج بارفا عاديين و 4 ديودرو و جال للمناطق الحساسة وكاين تانيك ديودرون للمناطق الحساسة و كريمات الجسم اشري طاقم نيفيا بزاف مليح او أشري كل حاجة وحدها  (صابون . شمبوا . مزيل المكياج و كريمات للجسم ، للوجه ، لليدين ، للارجل ... ) طبعا كل وحدة تشري زوج حوايج من كل حاجة لخاطر يخسرو لوكان تكثرو منهم.. و المكياج اتروحي للحانوت يقلك و لا ادي وحدة تفهم و تشريلك و ما تنسيش طلاء الاظافر و مزيل طلاء الاظافر .

ملاحظة :

تكثير الفاليزات ماكلاه زوز يكفوك و اطلبي من اقاربك لانهم غير خسارة معش راح اديري بيهم خلاص

11 _الهدايا :

ركزي على عجوزتك وشيخك وسلافاتك والباقي دريلهم حاجة رمزية .. قطعة كتان و قرعة ديدورو و لا قالب صابون و طرف المهم نسقي و شوفي على واش تقدري وأهم شخص هو راجلك ديريلو كادو شباب مع بارفا وشوية كوسميتيك مصحف و ساعة ..