الاكتئاب مرض نفسي تابع لمجموعة اضطرابات المزاج والكلام في شرحه يطول وفيه تفاصيل كتيرة ... ممكن يجي لوحده وممكن يكون جزء من أمراض نفسية تانية زى الاضطراب الوجدانى ثنائي القطبين وبعض اضطرابات الشخصية واضطرابات القلق كتير جدا بيكون معاها أعراض اكتئاب .
٢٥ % فقط من مرضى الاكتئاب هما اللي بيروحوا لطبيب نفسي ... والباقيين اما مستسلمين او بيروحوا عيادات الباطنة والقلب بالخطأ او بيروحوا للدجالين ! خصوصا في مصر .
الاكتئاب هو تجمع مجموعة أعراض مع بعضها بالقوة اللي تأثر على حياة المريض وعلاقاته ووظيفته ( وده شرط مهم لكل الامراض النفسية ) وميكونش سببه مرض عضوي تانى او عقار معين .
الاعراض دي بشكل مبسط :
مزاج حزين في أغلب ساعات اليوم وبكاء كثير بدون سبب واضح
اضطراب في الوزن والاكل .. كتير اوى او قليل اوى
اضطراب في النوم ... كتير او قليل
فقدان القدرة على الاستمتاع بالحياة او بالاشياء اللي كانت بتبسطه مبقتش تبسطه ... حتى العبادات ببتغير الاحساس بيها جدا
قلة النشاط الجسماني والشعور بالارهاق الدائم
ضعف الذاكرة ونقص القدرة على التركيز
نظرة تشاؤمية للحياة واحساس شديد بالذنب
اعراض جسمانية والالم بالظهر واخساس بالارهاق والضعف
افكار انتحاريه او محاولات انتحار .
أسبابه : تغير في بعض المواد الكيميائية بالمخ زى السيروتونين والنورادرينالن وده بيعلاجه العلاج الدوائي ( وده من اهم الادلة انه مرض وليس بعد عن الله .. فالبعد عن الله مبيتعالجش بمضادات الاكتئاب انما الاكتئاب بيتعالج )
وده بيرجع لاستعدادات جينيه وبيئية وحاجات في طريقه تفكير الشخص ونظرته للخياة ومعتقداته العميقه وده اللي بيعالجه العلاج السلوكي المعرفي
برده مبنفعش لما تقرا الكلام ده تقول انك مريض بيه ... روح لطبيب نفسي يشخصك لان الامراض عندنا متداخله جدا
السؤال بتاع الضغوط النفسية ... الضغوط بتعمل حاجة اسمها stress وده لو بقى مزمن ممكن يبقى اكتئاب عادي
لو حد اتعرض لصدمة بتحصله اعراض شبيهه بالاكتئاب بس ليها اسماء تانية عندنا زى اضطرابات التكييف او اضطراب كرب ما بعد الصدمة او صعوبات في الحياة ... اعراضها وعلاجها مبيختلفش عن الاكتئاب ... وفي حاجة اسمها grieve وهو الحزن الشديد بعد فقدان شخص عزيز بيعتبر طبيعي لحد وقت معين وبشده معينة بعد كدة ممكن يبقى مرضي ومحتاج علاج .
احنا في الدنيا مش محميين من الحزن ... الحزن جزء من تركيب الانسان وجزء اساسي ومهم من المشاعر وله فوائده ... وفي اعتقداتي انه من اهم مولدات الابداع والروحانية وفهم الذات والغير بل وفهم الله سبحانه وتعالى ... والاكتئاب من اكتر التجارب اللي ممكن تقرب الانسان جدا من ربنا وتوصل روحه بروح الله .
هل الاكتئاب مرض مزمن ؟
اوقات بيحصل الاكتئاب في اطار امراض نفسية مزمنة واوقات ببيجي مرة واحدة بس لكن طالما جه مرة فاحتمال بتكرر تاني حتى لو بعد فترات طويلة ... وفي نوع منه اسمه dysthymia بيكون نفس الاعراض بشدة اقل شوية لكن لفترات طوبلة بتوصل سنوات وبرده الطبيب النفسي اللي بيشخصه .
الاكتئاب مرض معدى؟؟ لا
يعنى بيورث او بياثر عل محيطين؟؟ ايوة ممكن يورث وطبعا بيأثر على المحيطين خاصة لو اطفال لأم مريضه بيه او أب مريض بيه ... او أم وأب لمريض اكتئاب ده في حد ذاته نوع من الضغوط النفسية الصعبة
ادوية الاكتئاب :
ليست ادوية ادمانية ... مبتتاخدش عند اللزوم ده كورس علاجي لا يقل عن ٦ شهور وطالما بدأته مينفعش يتوقف مرة واحدة بيسحب تدرجيا في اغلب الاحوال
ليها اعراض جانبيه بالطبع زى اي دوا وانا معرفش ليه الفوبيا من الادوية النفسية واخده الحيز ده ممكن مريض فعلا يفضل يقاوم المرض سنة وحياته بتدمر لمجرد خوفه من حباية دوا ! ... ادوية الاكتئاب والادوية النفسية عامة من نعم ربنا وليها نسب تحسن وشفاء عالية جدا اكتر من امراض تانية كتير ... وكل فترة الادوية بتتطور والاثار الجانبية بتكون افضل .
الاكتئاب مرض
د علا هلال