كي كنا صغار جات لعندنا و جابت معاها صبرينة بنتها، نشفا كنا قاعدين فليل انا و صبرينة في الكوزينة راح نتعشاو واش خرجلنا... خرجلنا ڨرلو (حاشاكم)
كي شافت صبرينة الڨرلو ناضت تعيط تقول شافت ديناصور
أو مون ديو كافاغ دادي غوڨاغد كافاغ
و رفدت بليغة راح تقتلو 
انا الصح تبهدلت ما صبتش واش ندير قلت خليني نخرط شوية
شديتلها يدها قلتلها نو صبرينة ما تقتلوش
سي تان كافاغ دوميستيك (معناها أليف)
قاتلي كيفاه يعني دوميستيك
قلتلها هادا حنا هنا نربوه بالعاني 
قاتلي بوغكوا قلتلها مليح للعين و يجيب البركة لدار 
و باه تآمني رفدتو بيدي و بديت زعما نلعب معاه اغغغغغ نو نو اغغغغ نونو 
و رفدت شوي خبز و عطيتهولو
من داك النهار رجعت كل ما نجي فايت على الكوزينة نلقاها تلعب مع الڨرلو و توكل فيه الخبز
الصح قلبي خرجتهولي
و نهار جاو مروحين لفرانسا قاتلي دادي آسكو جو بو بخوندغ مي زامي لي كافاغ معايا
قلتلها وي صيدت زوج و عطيتهملها خباتهم في قرعة و داتهم معاها لفرانسا 
تبا لحياتي ڨرولو راح لفرنسا و انا قعدت هنا 
الحاصول هوما غير روحو و حنا شرينا فليطوكس و الدوا باش نقضيو على الڨرلو لي تكاثر بسبب الخبز و الماكلة لي كانت سي صبرينة توكل فيهم و هو يامات عيطت خالتي ليما قالتلها قولي لبنك الله لا يتربحك دارنا تعمرت ڨرلو و صبرينة قالتنا كون تقتلوه نهرب من الدار 
المهم ديت طريحة تاع كلاب و لليوم مازادوش جاو لعندنا و تحرمت من الشيفون لي كانو يجيبوهلي نتڨوعر بيه على صحابي
منقوول